МАЪМУРИЙ СУДЛАР БЎЙИЧА СУД-ҲУҚУҚ ТИЗИМИДА АМАЛГА ОШИРИЛГАН ИСЛОҲОТЛАР.

Тошкент шаҳар маъмурий суди биносида жорий йилнинг 30 апрель куни судья Юсупов Акрам Абдивахидович ҳамда Судьялар Олий мактаби тингловчилари иштирокида “Маъмурий судлар бўйича суд-ҳуқуқ тизимида амалга оширилган ислохотлар” мавзусида давра сухбати ўтказилди.

Мамлакатда амалга оширилаётган ислоҳотлар хоҳ у ижтимоий-иқтисодий, хоҳ маданий-маънавий ёки суд-ҳуқуқ, улардан кўзланган олий мақсад фуқароларнинг ҳуқуқ ва эркинликларини самарали ҳимоя қилиш, уларнинг қонуний манфаатлари бузилишининг олдини олишга қаратилган бўлади.

Фуқаролар ва тадбиркорлик субъектларининг ҳуқуқлари, эркинликлари, қонуний манфаатларининг ишончли суд ҳимоясини таъминлаш мақсадида давлат органлари ва мансабдор шахсларнинг ғайриқонуний ҳаракатлари(ҳаракатсизлиги) устидан бериладиган шикоятларни, яъни оммавий-ҳуқуқий муносабатлардан келиб чиқадиган низоларни кўриб чиқишга ваколатли маъмурий судлар ташкил этилди.

Бугунги кунда суд қарорларини қайта кўришда вилоят судлари ҳамда уларга тенглаштирилган судларнинг имкониятларидан самарали фойдаланиш, фуқароларнинг шикоят қилиш ҳуқуқидан фойдаланиш имкониятларини янада кенгайтириш зарурияти вужудга келмоқда. Шу мақсадда, суднинг қарори, ажрими устидан шикоят бериш масаласида янги институт-суд ишларини тафтиш тартибида кўриб чиқиш амалиёти жорий этилди. Бу тартибнинг амалга оширилиши билан одил судловга эришишнинг имкониятлари янада кенгайиб, аҳолининг судма суд овора бўлиб юришига барҳам берилди. Бунда биринчи инстанция судининг қарор ёки ажримидан норози тарафлар вилоят судига апелляция ёки кассация тартибида шикоят қилиб, уларнинг ҳам натижасидан қониқмаса, ушбу иш мазкур судларда тафтиш тартибида кўриб чиқилади. Суд қароридан яна норози бўлинган тақдирда вилоят ва унга тенглаштирилган судлар томонидан тафтиш тартибида кўриб чиқилган ишлар Олий суднинг судлов ҳайъатларида қайта кўриб чиқилади.